കണ്ണൂർ: കുമാരൻ വൈദ്യരുടെ നിര്യാണത്തോടെ നാടിന് നഷ്ടമായത് ജനകീയനായ നാട്ടുവൈദ്യനെയാണ്. കണ്ണൂർ നഗരത്തോട് അടുത്തുകിടക്കുന്ന എല്ലാ പഞ്ചായത്തുകളിൽ നിന്നും ഒരുകാലത്ത് വൈദ്യരെ തേടി ആളുകൾ എത്തുമായിരുന്നു. വാഹനങ്ങൾ കുറവായിരുന്ന കാലത്തും വൈദ്യരെ തേടി വിഷംതീണ്ടിയവരെയും കൊണ്ട് ആളുകൾഎത്തിച്ചേരുമായിരുന്നു.
വർഷങ്ങൾക്ക് മുമുമ്പ് എം.വി. രാഘവൻ പ്രസിഡന്റായ പാപ്പിനിശ്ശേരി വിഷാചികിൽസാലയത്തിന്റെ പ്രഥമ വിഷ വൈദ്യനായിരുന്നു പാപ്പിനിശ്ശേരി പഞ്ചായത്ത്മെമ്പർ കൂടിയായിരുന്ന സി.പി കുമാരൻ വൈദ്യർ. അതിനു മുമ്പ് പാപ്പിനിശ്ശേരി പഞ്ചായത്ത് ഓഫീസിന്റെ വരാന്തയിലായിരുന്നു വൈദ്യരുടെ ചികിൽസ. തികച്ചും സൗജന്യചികിൽസയായിരുന്നു അദ്ദേഹത്തിന്റേത്. കാലത്തു മുതൽ രാത്രി പതിനൊന്നു മണി വരെ കൈയിൽ ഒരു ടോർച്ചുമായി ഇരിക്കുമായിരുന്ന വൈദ്യരെ പഴയ തലമുറ ഇന്നും ഓർക്കുന്നുണ്ട്.
1967-ൽ പാപ്പിനിശ്ശേരി പ്രാഥമികാരോഗ്യ കേന്ദ്രത്തിലേക്ക് സ്ഥലം മാറ്റം ലഭിച്ചുവന്ന ഡോ. സൈനുദ്ദീനുമായി ചേർന്ന് അലോപ്പതി, ആയുർവേദ മരുന്നുകൾ സമന്വയിപ്പിച്ച് നടത്തിയ ചികിൽസാരീതി ഇന്നും പ്രശസ്തമാണ്.
വിഷവൈദ്യനായിരുന്ന പിതാവ് കുഞ്ഞിക്കൊട്ടൻ വൈദ്യരിൽ നിന്നും മുത്തച്ഛനിൽ നിന്നും കല്യാശ്ശേരിയിലെ കിണറ്റിൻ കര കുഞ്ഞിരാമൻ വൈദ്യരിൽ നിന്നും വളരെ ചെറുപ്പത്തിൽ തന്നെ വൈദ്യർ വിഷവൈദ്യം പഠിക്കുകയും ചികിൽസയിൽ പ്രാവിണ്യം തെളിയിക്കുകയും ചെയ്തു. ദീർഘകാലത്തെ ആയുർവേദ ചികിൽസാരംഗത്തെ സേവനം പരിഗണിച്ച് കേന്ദ്രഗവൺമെന്റ് ആയുർവേദ ഫെലോഷിപ്പ് നൽകിയിരുന്നു. ആയുർവേദ വിദ്യാഭ്യാസ ബോർഡിന്റെ മെംബറായും ദീർഘകാലം വൈദ്യർ പ്രവർത്തിച്ചിട്ടുണ്ട്.
കൂടാതെ ആയുർവേദശിരോമണിപട്ടവും അദ്ദേഹത്തെ തേടിയെത്തിട്ടുണ്ട്. ഇതിനു പുറമെ പാമ്പു വിഷത്തെ കുറിച്ച് പഠിക്കാൻ ഡബ്ല്യു. എച്ച്. ഒ നിയോഗിച്ച പഠനസംഘത്തിന്റെ ഗൈഡായി പ്രവർത്തിക്കാനുളള അപൂർവ്വസൗഭാഗ്യവും അദ്ദേഹത്തിന് ലഭിച്ചിട്ടുണ്ട്. വിഷചികിൽസാരംഗത്തെ സ്ത്യുത്യർഹ സേവനത്തിന് പാപ്പിനിശ്ശേരി പൗരാവലി സംഘടിപ്പിച്ച ചടങ്ങിൽ വച്ച് മന്ത്രി കെ. സി ജോസഫ് പൊന്നാടയണിയിച്ച് അദ്ദേഹത്തെ ആദരിച്ചിരുന്നു. പാമ്പുവിഷത്തിന് പുറമെ എട്ടുകാലി വിഷത്തിനും മറ്റ് വിഷബാധകൾക്കും കുമാരൻ വൈദ്യർ ഫലപ്രദമായി ചികിൽസിച്ചിട്ടുണ്ട്. മഞ്ഞപ്പിത്തത്തിനുളള അദ്ദേഹത്തിന്റെ ഒറ്റമൂലിചികിൽസയും വടക്കെ മലബാറിൽ പ്രശസ്തമാണ്.
Keywords: Kumaran Vaidyar Pappinissery, Kannur, Obituary, Kerala, Malayalam News, National News, Kerala News, International News, Sports News, Entertainment, Stock News. current top stories, photo galleries, Top Breaking News on Politics and Current Affairs in India & around the World, discussions, interviews and more.
Post a Comment