രാജേഷിനെ ജൂണ്‍ 17നു ചോദ്യം ചെയ്യാനാണ് അന്വേഷണ സംഘം ആദ്യം തീരുമാനിച്ചിരുന്നത്. എന്നാല്‍ നിയമസഭാ സമ്മേളനം നടക്കുന്നതിനാല്‍ ചോദ്യം ചെയ്യലിനു വിധേയനാകാന്‍ എത്താനാകില്ലെന്നു കാണിച്ചു രാജേഷ് രേഖാമൂലം മറുപടി അന്വേഷണ സംഘത്തിനു നല്‍കി. ഇതേ തുടര്‍ന്നു ചോദ്യം ചെയ്യല്‍ നിയമസഭാ സമ്മേളനം കഴിഞ്ഞു മതിയെന്നു പോലീസ് തീരുമാനിക്കുകയായിരുന്നു. എം.എല്‍.എയായതിനാല്‍, നിയമസഭാ സ്പീക്കറുടെ പ്രത്യേക അനുമതി വാങ്ങിയാണ് രാജേഷിനെ ചോദ്യം ചെയ്യുന്നത്. കേസുമായി ബന്ധപ്പെട്ടു സി.പി.എം ജില്ലാ സെക്രട്ടറി പി. ജയരാജനെ രണ്ട് തവണ ചോദ്യം ചെയ്തിട്ടുണ്ട്. ജയരാജന്റെ മൊഴിയും രാജേഷിന്റെ മൊഴിയും തമ്മില്‍ വൈരുധ്യമുണ്ടോയെന്നതാകും അന്വേഷണ സംഘം പ്രധാനമായും പരിശോധിക്കുക. രണ്ട് തവണ ചോദ്യം ചെയ്തതില്‍ ജയരാജന്റെ മൊഴിയില്‍ വൈരുധ്യമുണ്ടെന്നാണ് സൂചന. കൊലപാതക ഗൂഢാലോചന നടത്തിയത് തളിപ്പറമ്പ് സഹകരണ ആശുപത്രിയിലെ അടച്ചിട്ട മുറിയില്‍ ടി.വി. രാജേഷും പി. ജയരാജനും ഉള്‍പ്പെട്ട സംഘമാണെന്നു ലഭിച്ച മൊഴിയുടെ അടിസ്ഥാനത്തിലാണ് ഇവരെ ചോദ്യം ചെയ്യാന്‍ പോലീസ് തീരുമാനിച്ചത്.
Post a Comment