പാര്‍ട്ടി കോണ്‍ഗ്രസ് കഴിഞ്ഞു ട്രെയിനില്‍ വരുന്നതിനിടെ ആന്ധ്രപ്രദേശിലെ ഓങ്കോളില്‍ വച്ചു ഇ.പി. ജയരാജനു നേരെ വെടിവയ്പ്പുണ്ടായത് ഗൂഢാലോചനയുടെ ഫലമായി സംഭവിച്ചതാണെന്നു കരുതുന്നുവെന്നായിരുന്നു പ്രശാന്ത് ബാബു കഴിഞ്ഞ ദിവസം ചില ചാനലുകളോട് വെളിപ്പെടുത്തിയത്. ഇതോടൊപ്പം കണ്ണൂരിലെ സേവറി ഹോട്ടലിനു നേരെയുണ്ടായ ബോംബാക്രമണത്തില്‍ നാണു എന്ന ജീവനക്കാരന്‍ കൊല്ലപ്പെട്ടതും തെക്കീബസാറിലെ സിപിഎം നിയന്ത്രണത്തിലുള്ള സഹകരണപ്രസിനു നേരെ ആക്രമണമുണ്ടായതും സുധാകരന്റെ അറിവോടെയാണെന്നും പ്രശാന്ത് ബാബു വെളിപ്പെടുത്തിയിരുന്നു. എറണാകുളത്തെ ഒരു ക്വട്ടേഷന്‍ടീമിനെ ഇതിനായി സുധാകരന്‍ കണ്ണൂരിലേക്കു വിളിച്ചു വരുത്തിയതാണെന്നും പ്രശാന്ത് ബാബു പറഞ്ഞിരുന്നു. സുധാകരന്റെ നടാലിലുള്ള വീട്ടില്‍ വച്ചു നടന്ന ഗൂഢാലോചനയില്‍ കണ്ണൂരിലെ ഒരു അഭിഭാഷകനും ഉണ്ടായിരുന്നുവെന്നും ആരോപിച്ചിരുന്നു. സംഭവസമയത്ത് ഇതേ കുറിച്ചു തനിക്കു വ്യക്തതയില്ലായിരുന്നു. പിന്നീട് ഇ.പി.ജയരാജനു വെടിയേറ്റ ശേഷം കഴിഞ്ഞ കാര്യങ്ങള്‍ കൂട്ടിവായിച്ചപ്പോഴാണ് ഇതിനു പിന്നില്‍ ഗൂഢാലോചന നടന്നതായി താന്‍ വിലയിരുത്തിയതെന്നാണ് പ്രശാന്ത് ബാബു പോലീസിനോടു പറഞ്ഞിരിക്കുന്നത്. ഇതോടൊപ്പം നാല്‍പാടി വാസു വധക്കേസ്, ചൊവ്വയിലെ സഹകരണബാങ്ക് ആക്രമിച്ചു ജീവനക്കാരനായ വിനോദിനെ വെട്ടിപരിക്കേല്‍പിച്ച സംഭവം എന്നിവയെ കുറിച്ചും പോലീസ് ചോദ്യങ്ങളുന്നയിച്ചു. എന്നാല്‍ മ്റ്റു പലകേസുകളെ കുറിച്ചും വ്യക്തമായ അറിവില്ലെന്ന രീതിയിലാണ് മൊഴി നല്‍കിയതെന്നും സൂചനയുണ്ട. ഇതിനിടെ സുധാകരന്‍ ഡിസിസി പ്രസിഡന്റായിരുന്ന കാലഘട്ടത്തില്‍ ഓഫീസില്‍് ബോംബുകള്‍ ഉള്‍പ്പെടെയുള്ള സ്‌ഫോടകവസ്തുക്കള്‍ ശേഖരിച്ചു വച്ചതിനെ കുറിച്ചും മൊഴിയില്‍ പരാമര്‍ശിച്ചതായി സൂചനയുണ്ട്.
ഇതിനിടെ സര്‍ക്കാര്‍ തന്റെ സുരക്ഷയ്ക്കായി നിയോഗിച്ച പോലീസ് സുരക്ഷ പിന്‍വലിക്കണമെന്നാവശ്യപ്പെട്ടു പ്രശാന്ത്ബാബു എസ്പിക്കു അപേക്ഷ സമര്‍പ്പിച്ചിരുന്നെങ്കിലും സുരക്ഷ പിന്‍വലിക്കേണ്ടതില്ലെന്ന തീരുമാനത്തിലാണ് പോലീസ്.
إرسال تعليق